Kontrolloni Gjobat e Trafikut Online në Kosovë

Keni gjoba të trafikut? Tashmë ato mund t’i kontrolloni online përmes plaftormës nga faqja zyrtare e Policisë së Kosovës ose platformës së re për kontrollimin e gjobave eKosova.

Platforma e shërbimeve elektronike eKosova është platformë për kryerjen e shërbimeve administrative publike për qytetarët e Republikës së Kosovës. Varësisht kërkesës tuaj, kjo platformë ju ofron mundësinë të kontrolloni dënimet në trafik duke përfshirë gjobat individuale dhe gjobat sipas referencës. 

Platforma për gjobat në trafik, eKosova është shumë e lehtë për t’u përdorur. Për të pasur qasje në platformë, ju së pari duhet të regjistroheni si përdorues i ri me të dhënat tuaja personale. 

Ndiqni hapat më poshtë për të parë se si mund të regjistroheni në platformë.

1. Krijoni llogarinë tuaj në eKosova

Ju mund të krijoni një llogari të re duke u regjistruar përmes formës për regjistrim në: https://ekosova.rks-gov.net/Security/Registration 

Juve do të ju hapet një dritare e re, me të dhënat që duhet t’i plotësoni për të filluar me procesin e regjistrimit.

Të dhënat e kërkuara nga sistemi për procesin e regjistrimit janë:

     1. Numri Personal

     2. Numri i telefonit

     3. Email adresa

     4. Fjalëkalimi

Pasi të plotësoni të dhënat e kërkuara, në email-in e përdorur gjatë regjistrimit, ju do të pranoni një kod për konfirmim të cilin pastaj duhet ta shkruani në dritaren e hapur të platformës. Në momentin që shkruani kodin të cilin e pranoni në email-in tuaj, ju zyrtarisht jeni të regjistruar në platformën eKosova.

2. Kyçuni në llogarinë tuaj

     1. Shkruani Numrin Personal & Fjalëkalimin

     2. Klikoni opsionin “Shërbimet”

     3. Zgjidhni shërbimin “Policia”

Sapo të zgjidhni shërbimin “Policia”, juve do të ju shfaqet këto dy opsione:

     1. Kërkimi i gjobave individuale - Këtu kontrollohen gjobat sipas numri tuaj personal.

     2. Kërkimi i gjobave sipas referencës - Këtu ju duhet të shkruani numrin e referencës dhe të klikoni “Kërko”.

Nëse sapo keni marrë gjobë trafiku dhe jeni të interesuar ta kontrolloni apo ta paguani atë mirëpo ajo nuk shfaqet në platformë, ju duhet të prisni 1 deri 2 ditë derisa gjoba të figurojë në sistem.

Tashmë ju jeni të regjistruar në platformë eKosova. Kjo ju mundëson që tani e tutje të kyçeni direkt tek shërbimi "Policia" dhe të kontrolloni gjobat online vetëm duke klikuar në këtë link: https://ekosova.rks-gov.net/Service/9.

3. Platforma e Policisë së Kosovës

Përveç mënyrës së re për kontrollim të gjobave përmes platformës eKosova, ju mund t’i kontrolloni ato edhe përmes faqes zyrtare të Policisë së Kosovës në të cilën mund të hyni përmes këtij linku: https://www.kosovopolice.com:85/login. 

Vlen të ceket se kjo platformë për momentin është jashtë funksionit dhe mënyra e vetme për kontrollim të gjobave të trafikut në Republikën e Kosovës, mbetet platforma eKosova. Ne do t’ju njoftojmë me kohë nëse kjo platformë do të rikthehet në funksionim.