Ide të lira dhe të thjeshta për dizajnimin e kopshtit tuaj

Nëse jeni duke kërkuar një mënyrë për të sjellë bukurinë e natyrës në shtëpinë tuaj, duhet të filloni me një dizajn kopshti. Në shumicën e rasteve, është më mirë të filloni me rregullime të vogla apo me diçka të thjeshtë dhe të lirë. Pastaj ju mund të ndërtoni mbi konceptin ndërsa shtoni tipare dhe elementë të rinj në dizajnin e kopshtit tuaj.

Të kesh një kopsht është ëndrra e çdo pronari të shtëpisë. Nëse dëshironi të zbukuroni shtëpinë tuaj dhe të rrisni vlerën e saj, do të ishte një ide e zgjuar të kishit një kopsht ose një oborr të rregulluar të shtëpisë. Nëse ende nuk keni ndonjë ide se si të filloni me rregullimin e kopshtit tuaj, mund të shikoni disa shembuj që do t'ju ndihmojnë të frymëzoheni për një kopsht të bukur.

Më poshtë mund t’i gjeni idetë më të mira për hartimin e kopshtit që nuk kushtojnë shumë dhe që janë mjaftë atraktive për kopshtin tuaj.

    1. Dekoroni vazot e luleve

Vazot e luleve janë dekore që çdo kush i ka në shtëpitë apo kopshtet e tyre, por ndoshta nuk ju bën përshtypje pamja e tyre e jashtme. Zakonisht, vazot e luleve mund t’i gjejmë me ngjyra neutrale si të bardhë, të zezë, ngjyrë kafe, të gjelbër, etj.

Por, çfarë ndodh nëse ne ju themi se ato mund të bëhen shumë atraktive nëse ju vendosni të merreni me dizajnin e tyre? Ju mund të ikni nga e zakonshmja duke i ngjyrosur ato me ngjyrë akrilike ose ngjyrë që përdoret për ngjyrosje të jashtme për ti dhënë atyre një pamje të re që do t’i jap jetë kopshtit tuaj.

Nëse ju duhet frymëzim për krijimin e dizajneve, ne ju sugjerojmë të hulumtoni në internet për ngjyrat dhe modelet e duhura, për të krijuar vazo lulesh unike dhe të personalizuara për kopshtin tuaj. Përveç se konsiderohet si një dekorim mjaft kreativ i kopshtit, ngjyrosja e vazove mund gjithashtu të jetë një aktivitet i shkëlqyer artizanal për tu bërë me fëmijët tuaj.

    2. Ngjyrosni rrethojat e kopshtit tuaj

Një nga mënyrat më të thjeshta për të transformuar më lehtësi pamjen e kopshtit tuaj nën buxhet është ngjyrosja e rrethojave rreth kopshtit tuaj. Pavarësisht se çfarë ngjyrë zgjidhni, ngjyrosja e rrethojave është gjithmonë ide e mirë dhe bën që shtëpia juaj të duket e rregulluar në mënyrë perfekte. 

Ngjyrat që mund t’i përdorni për ngjyrosjen e rrethojave mund të jenë e bardhe, e zeze, ngjyrë kafe, apo ngjyra tjera që përshtaten me pamjen e jashtme të shtëpisë tuaj. Sigurohuni që për ngjyrosje të zgjidhni një ngjyrë që është e qëndrueshme ndaj motit pasi ngjyra do të qëndrojë në ambient të jashtëm, në shi, në diell dhe në borë.

    3. Ricikloni shishet e plastikës

Keni shishe të plastikës dhe nuk dini se çfarë të bëni me to? Përdorimi i shisheve të përdorura të plastikes si vend për mbjellje të luleve mund të jetë një ide eko-miqësore dhe nën buxhet për dizajnimin e kopshtit.

Ndoshta ju duket një ide pak e çuditshme dhe jo e zakonshme, por përdorimi i shishes në këtë formë do të bëjë që kopshti juaj të duket mjaftë bukur dhe interesant.

Për të bërë një shishe plastike të përshtatshme për mbjelljet tuaja, ju duhet të prisni një vrimë të madhe në njërën ane dhe të shponi disa vrima të vogla në anën tjetër pasi gjatë ujitjes uji duhet të kullohet. Pasi të keni prerë shishen në formën e duhur, ju mund ta mbushni atë me dhe dhe të vendosni farat apo fidanët tuaj. Këto shishe mund t’i varni në një mur apo rrethoja te kopshtit.

    4. Krijoni ulëse me paleta druri

Paletat prej druri janë aksesorët që i duhen më së shumti kopshtit tuaj. Marrë parasysh se druri është një nga materialet më të përshtatshme për mobile kopshti duke konsideruar qëndrueshmërinë e tyre ndaj motit, ato gjithashtu mund t’i merrni me çmime të përballueshme, madje në disa raste edhe falas. Në shumicën e rasteve ato mund të gjenden në bizneset lokale pasi ato nuk përdoren më apo në faqe të internetit siç është MerrJep.com.

Sapo të gjeni paletat e drurit mund të filloni me krijimin e ulëses. Ju thjeshtë duhet t’i vendosni paletat në mënyrë horizontale në formën e shkronjës L, si dhe të vendosni disa paleta tjera në formën vertikale në mënyrë që të krijoni një mbështetëse.

Pasi të arrini të ndërtoni formën e dëshiruar të paletave, ju mund të vendosni jastëk apo batanije mbi to dhe të krijoni një kënd të përshtatshëm ndeje.

    5. Shtoni ndriçim në kopsht

Ndriçimi i jashtëm është një nga mënyrat më të lehta dhe efektive për t’i shtuar jetë kopshtit tuaj dhe për ta transformuar atë në një ambient të këndshëm në të cilin ju mund t’i kaloni mbrëmjet tuaja. Dritat e varura në një pemë apo dritat e vendosura poshtë në tokë do t’i japin kopshtit tuaj një shkëlqim mahnitës.

Llojet e dritave që mund të përdoren për ndriçim të jashtëm janë dritat LED, të cilat siç tashmë edhe dihet, përdorin pak energji elektrike. Një tjetër lloj i dritave që mund të përdoren në këtë rast janë edhe dritat diellore apo solare, të cilat ushqehen nga dielli dhe funksionojnë mjaft mirë dhe nuk shpenzojnë energji elektrike.

    6. Krijoni një shteg me gurë

Nëse kopshti juaj është një sipërfaqe e tëra me bar dhe pa ndonjë ndarje, ne ju sugjerojmë të krijoni një rrugë me gurë dekorativ për ta ndryshuar atë dhe të thyeni monotoninë e sipërfaqes së gjelbër. Pavarësisht nëse zgjidhni që rruga juaj e krijuar të ju dërgojë në kopshtin tuaj të perimeve apo diku tjetër, është mirë që ta keni një të tillë pasi zbukuron hapësirën tuaj.

Pasi të zgjidhni se në cilën pjesë të kopshtit tuaj do të krijoni shtegun, ju mund të blini materialin dhe të krijoni shtegun së pari duke gërmuar terrenin dhe pastaj ta mbushni atë me gurë dhe të mbillni lule anash.

    7. Mbillni lule të bukura

Një mënyrë e thjeshtë dhe shumë e bukur për të përmirësuar pamjen e kopshtit tuaj është të mbillni lule shumëngjyrëshe të cilat mbushin hapësirën e kopshtit tuaj si dhe lëshojnë aromë freskuese përreth. Ju mund të zgjidhni t’i mbillni ato në një vazo në mënyrë që t’i fusni brenda shtëpisë pasi të kryhet sezoni e verës apo të zgjidhni lule të cilat mbillen në tokë dhe qëndrojnë gjatë gjithë verës.

    8. Përdorni gomat e përdorura si vend për të mbjellë lule

Gomat e përdorura janë një tjetër mënyrë mjaft kreative që mund të përdoren për mbjellje në vend të vazove. Në mënyrë që gomat të duken sa më atraktive për syrin, ne ju sugjerojmë t’i ngjyrosni ato me spërkatës me ngjyra të ndritshme ose pastel. Pasi të kryeni procesin e ngjyrosjes, ju mund t’i mbushni ato me dhe dhe pastaj të mbillni bimët apo lulet tuaja të preferuara.

Këto janë disa nga idetë që mund t'i përdorni për dekorimin e kopshtit tuaj. Shumica e këtyre gjërave mund të gjenden në garazhat e shtëpive  tuaja dhe nuk përdoren më nga ju. Mirëpo, tani ka ardhur koha që ti përdorni ato për të zbukuruar kopshtin tuaj duke e transformuar atë në një vend perfekt për të kaluar verën.